MANUMAALO O TE FAKATOKAAGA (#12336)

E lavea ne Koe, O toku Atua, me ne aofia pefea a Au taugasoa fakapelepele ne latou ko la e se fakalogo mai i Au mea faiite mo tino masei i vasia o Au tino.  E seai se laufenua e toe na loa ko te fanoanoa o Au fagasele mo te tagi o Au tino filifilia ne avaka ki luga mai i ei.  Au e akai totuli kia Koe i Tou Igoa tafasili i te Maluga ke futi mai a te lima o te maalosi mai i te gali o Tou mafi kae ke fesoasoani kia latou katoa ko la e alofa kia Koe.  
  
E puke ne Koe, O toku Atua, a olotou mata ko fuli tu kia Koe, ko te olotou kiloga ko fakammau I luga i te Aso Malulu o Tou mafi mo Tou atamai alofa.  Fuli aka, O toku Aliki, a te olotou tulaga tafalalo ki te matagofie, te olotou mativa ki te maumea, mo te olotou vaaivaiiga ki te maalosi mai ia Koe.  
  
E maalosi Koe o fai so se mea te la e loto Koe ki ei.  E seai se Atua na ko Koe, ko te Poto-Katoatoa, ko te Iloa-Katoatoa.

-Bahá'u'lláh
-----------------------

MANUMAALO O TE FAKATOKAAGA (#12337)

Se fakamae gina au, O te Atua, toku Atua, o taofi mai i te lagi o Au koloa lauefa mo te fetuao o Au alofaaga.  Au e akai totuli kia Koe i Tau Muna mai luga i mea katoa lavea mo te se lavea ko oti ne taofi ki lalo ne Koe ke fesoasoani kia au kae ke fesoasoani ki tino filifilia ke fakataunu a mea ko la ka fakamaluga ne latou a Tau Fakatokaaga i vasia o Au tavini kae i koga fenua katoa.  Fakaeke mai ne Koe kia au a mea llei taki tasi katoa ko la ko oti ne tuku ifo ne Koe i Tau Tusi.  
  
E tonu ia Koe ko te Mafi-Katoatoa, ko te Fakamagalo-Katoatoa, ko te Tafasili i te Alofa-Atafai.

-Bahá'u'lláh
-----------------------

MANUMAALO O TE FAKATOKAAGA (#12338)

Tavaeega maluga e i Tou igoa, O te Aliki toku Atua!  A te pogisa koi i luga i fenua katoa, ako te maalosi o te amio masei ko siomia i fenua katoa.  Mai ia latou, e atafia ne au a mea gali o Tou atamai, kae matea a te maina o te molii o Tou atamai.  
  
Latou ko la e pono ne te veli mai ia Koe ko mafaufau me e isi se maalosi ia latou o tamate a Tou mainaaga, kae ke tamate a Tau afi, kae ke taofi a matagi o Tou alofa-kaimalie.  Ikaai, kae kit e mea tenei a Tou mafi e fai mo aku molimau!  Moi fai seai ko fakalavelave taki tasi e fai mo fai fekau o Tou atamai, kae ko tofotofooga taki tasi ko te auala o Tou atamai faka-te-lagi, seai se tino e mafai o teke mai kia matou, mai i te maalosi ote lalolagi mo te lagi e teke mai kia matou.  Moi fai au e faka-matala a mea funa o 
Tou atamai ko la e tuku aliali i mua o oku, a puilega o Ou fili e maofaofa ki lalo.  
  
Ko te matagofie e ia Koe, tena, O toku Atua!  Au e akai totuli kia Koe mai i Tou Igoa Tafasili i te Lasi ke luku fakatasi a latou ko la e alofa kia Koe fakapukupuku i te Tulafono te la e sofi mai i te fiafia llei o Tou finagalo, kae tuku ifo ki lalo ia latou a te mea te la a molimau tonu ki olotou loto.  
  
E maalosi a Koe o fai ate mea e fiafia Koe ki ei.  A Koe, e tonu, ko te Feasoasoani I Mea Faigata, ko te Ola-fua-ia-Ia.

-Bahá'u'lláh
-----------------------

MANUMAALO O TE FAKATOKAAGA (#12339)

Te Matagofie e io Koe, O te Aliki,Ko Koe Tela ne aumai kae fakafoliga a mea ola katoa, mai I luga I te maalosi o Tau ikuuga.  
  
O te Aliki!  Feasoasoani kia latou ko oti ne fakaseai a mea katoa na ko Koe, kae talia ko latou ke maua se manumaalo lasi.  Tuku ifo kia latou, O te Aliki, a te lukuuga mana o agelu i te lagi mo te lalolagi pe la foki mo mea katoa ko la ite va, o feasoasoani ki Au tavini, ke faka-manafafana kae faka-maalosi a latou, ke mafai ne latou o maua se manumaalo, ke ola loa latou aunoa mo se fakana, ke galue latou mo te matagofie, ke avatu ki luga ia latou a te maalu mo te lifu, ke faka-maumea latou kae ke fai latou ke manumaalo ki se manumaalo tafasili ite gali.  
  
Ko Koe ko te olotou Aliki, kote Aliki o lagi mo te lalolagi, ko te Aliki o lalolagi katoa.  Faka-maalosi a te Faka-tokaaga tenei, O te Aliki, mai i luga i te maalosi o tavini konei, kae fai aka latou ke maalosi atu i luga i tino katoa o te lalolagi; aua ia latou, i te tonuuga, ko Au tavini ko oti ne motu mai latou i mea katoa na ko Koe, a ko Koe, e tonu, ko te puipui o tauagasoa tonu.  
  
Talia ne Koe, O te Aliki, ko olotou loto ke mafai, mai i te tautali ki ei, ko Tau Fakatokaaga e se mafai o maofa, o tupu ola aka mai i luga atu i so se mea i lagi mo te lalolagi kae i loto o se mea i te va o latou; kae faka-maalosi, O te Aliki, a olotou lima mo meaalofa o Tou maalosi faka-ofoofogia ko te mea ke mafai ne latou of fakaasi a Tou maalosi mai i mua o mata o tino katoa.

-The Báb
-----------------------

MANUMAALO O TE FAKATOKAAGA (#12340)

O te Aliki!  Faka-soasoa aka mo te ola kimua fakavave o te Lakau Ola o Tau Tafatasi faka-te-lagi, fakasiusiu aka, O te Aliki, ki te vai tafe o te fiafia-llei, kae faka mafai aka, i mua o faka-asiiga o Tau faka-maalosi faka-te-lagi, ke fua mai ki fuaga lakau kaina pe la mot e mea e manako Koe ki ei mo fai a Ou tavaeega mo te fakamaluga, a Tou tavaeega mo te fakafetai, kae ke faka-lauefa a Tou Igoa, ke vikia a te tafatasi o Tou Uiga Tonu kae ke tuku atu foki a mitaaga kia Koe, pe la loa mo mea katoa e nofo i loto i Tau pule kae seai se isi tino aka.  
  
E lasi ate faka-manuiaaga o latou ko la a olotou toto ne fili ne Koe mo fakasiusiu a te Lakau Ola o Tau faka-pulaaga, te la i ei ko faka-maluuga a tau Muna mana kae e se mafai o fakaseegia.

-The Báb
-----------------------

MANUMAALO O TE FAKATOKAAGA (#12341)

O te Aliki!  Fai aka Au tavini onosai i Ou aso ke manumaalo mai i luga i te talia a latou ke maua se manumaalo e onomea kae ttau, pe la loa mo te mea ne saala ke mate latou faka-matulo i Tou auala.  Tuku ifo ki luga ia latou a te mea tela ka maua a te mafanfana ki olotou mafaufau, kae e fiafia i olotou kano loto, ke tuku atu se faka-talitonuuga ki olotou loto mo te tokaaga malie ki olotou fuaitino kae ka mafai ne olotou agaaga ola o olo atu ki mua o te Atua, ko te Tafasili i te Maluga,  kae ke maua ia latou a te Palataiso silisiliese mo nisi koga malolo matagofie ko la ko oti ne fakasino ne Koe mo tagata o te poto tonu mo uiga tonu.  E tonu, a Koe e iloa a mea katoa, a ko matou e seai na ko Au tavini, ko Au pologa, ko Au tino feasoasoani mo Au tino mativa taki toko tasi.  E seai aka se Aliki na ko Koe e tagi matou ki ei, O te Atua ko te motou Aliki, io me e akai matou ki ne fakamanuiaaga io me ne alofaaga mai i se isi tino na loa ko Koe, O ko Koe ko te Atua o te alofa mutimutivale i te lalolagi nei mo te sua lalolagi.  Matou ko te sai na ko fuaitino tonu o te mativa, o te matuaa seai lele loa, o te aunoa mo se maalosi lele loa mo te seoli, ako Tou Tino katoatoa e fonufonu i te maumea, i te tu tokotasi, i te matagofie, silisiliese, afioga mo te alofa aunoa mo se tuakoi.  
  
Fuli a te omotou taui, O te Aliki, kit e mea te la e onomea kae e ttau kia Koe i te llei o te lalolagi tenei mo te sua lalolagi, mo te alofaaga maukola e se lausia ko la ko fakaoko mai i luga i te lagi ki lalo ite lalolagi nei. 
 
E tonu, a Koe ko te Aliki mo te Aliki o mea katoa, Ki Ou lima e foki atu matou ki ei, kae finafinau ki mea ko la e ia Koe.

-The Báb
-----------------------

MANUMAALO O TE FAKATOKAAGA (#12342)

O te Aliki! Fai aka ko tino katoa o te lalolagi ke maua se avanoaaga ki loto i te Palataiso o Tau Talitonuuga, ko te mea ke seai se mea faiite e nofo mai i luga atu o tuakoi o Tou fiafiaaga-lei.  
  
Mai i te pilitakiiga o te vavau Koe e maalosi o fai a te mea e fiafia Koe ki ei kae maluga fakafia atu i se mea e manako Koe ki ei.

-The Báb
-----------------------

MANUMAALO O TE FAKATOKAAGA (#12343)

O te Atua, toku Atua! Tavaeega e ia Koe i te tafutafuuga o te afi o te alofa faka-te-lagi i te Lakau Ola Mana i tumu maluga o te mauga: ko te Lakau Ola tena “seai mai ite Sopoga-Laa io me mai i te Tooga-Laa,” (1) a te afi tena e ka lafulafu ke oko ki taimi a tena kaaga ko fano loa ki luga i te Lukuuga Mana Faka-te-Lagi i luga, kae mai i mea tonu kona ne maua ne ia a te mainaaga o te takitakiiga, kae tagi atu penei:  “E tonu ne atafia ne matou a te afi i te tapuvae Mauga o Sinai.”(2)   
  
O te Atua, toku Atua! Faka-maalosi aka ne Koe a te afi tenei, pe la mo te aso e tautali atu i sua aso, ke oko ki taimi a te mafaaga o ia ka faka-tonu a tamiloga o te lalolagi katoa.  O ko Koe, toku Aliki!  Faka ka a te molii o Tou alofa i loto taki tasi katoa, manava atu ki loto o agaaga ola o tagata a te agaaga o te poto, faka-fiafia a olotou fatafata ki kupu o Tou faka-tasitasi. Kalaga atu ne Koe ki te ola a latou ko la e nofo i olotou tugamau, kae poloaki ne Koe a latou faka-matamata, fai aka ate fiafia ke lausa i te lalolagi katoa, tuku ifo Au vai manino, kae i te lukuuga o faka-asiiga o mea gali, o fakateka a te ipu te la e “fakamakeke mai ite punaaga vai manogi gali.” (3)  
  
E tonu, Koe ko te Foai-fua, ko te Faka-magalo, ko te Tuku Mea-alofa.  E tonu Koe ko te ALofa-kaimalie, ko te Atafai.  
 

¹Qur’án 24:35.  
²cf. Qur’án 28:29. 
³Qur’án 76:5.

-`Abdu'l-Bahá
-----------------------

MANUMAALO O TE FAKATOKAAGA (#12344)

A Ia ko te Atua!  
  
O te Aliki, toku Atua, toku Fakasele Gali! A mea konei ko Au tavini ko la ko oti ne lagona ne latou a Tou Leo, fakalogo ki Tau Muna kae fakavave ki Tau Kalaga.  Ko oti latou ne talitonu ia Koe, molimaugina ne Au Mea Fakaofoofogina, talia ne Au faka-maoniiga kae lagogina ne Au faka-talitonuuga.  Latou ne sasale i Ou auala, tautali ki Tau takitakiiga, maua ne latou a Au mea lilo, kae maina i mea funa o Tau Tusi, ko Kupu o Au Tapeleti, mo tala llei o Au Fekau mo Tapeleti.  Ko oti latou ne piki ki te kapa o Tou gatu kae taofi mmau ki te peleue o Tou mainaaga mo te matagofie.  A olotou kalafaga ko oti ne fakamaalosi i Tau Feagaiiga a ko olotou loto ne fai ke tumau i Au faka-talitonuuga.  Te Aliki! Faka ka a olotou loto ki te ulaaga o Tou fiafaiiga faka-te-lagi kae talia aka ko te manu eva o te alofa mo te malamalama ke mafai o usu i loto i olotou loto.  Talia aka ke fai a latou pela me ne fakailoga, tulaga malifalifa, kae katoatoa pe la mo Tau Muna.  Fakamaluga ne latou a Tau Fakatokaaga, fola atu Au fuka kae faka-salalau atu ki koga mao Au mea gali.  Ke fai ne latou a Tau Muna ke manumaalo, kae faka-maalosi a fuaitino o Au fagasele.  Faka-maatala a olotou laulaufaiva ke vikia a Tou Igoa, kae faka-maalosi a latou ke fai ne latou a Tou fingalo mana mo te fiafia.  Fakamaina olotou mata i Tou maalo o te mana, kae faka-katoatoa a te olotou fiafia mai i te fesoasoani o latou ke tu ki luga i te manumaalo o Tau Fakatokaaga. 
 
Te Aliki!  Matou e vaaivai, faka-maalosi aka matou ke talai atu a manogi gali o Tou Mana; mativa, faka-maumea aka matou mai i 
maumea o Tou Fakatasitasi Faka-te-Lagi; seai ne lavalava, fakapei aka matou ki te gatu o Tou maumea; agasala, faka-magalo aka a 
motou agasala mai i luga i Tou alofakaimalie, Tou alofaga mo Tau faka seai o agasala.  A Koe, e tonu, ko te Lago, ko te Feasoasoani, ko te Atafai, ko te Mafi, ko te Maalosi.  
  
Ko te matagofie o matagofie e nofo i luga ia latou ko la e mmau kae tumau.

-`Abdu'l-Bahá
-----------------------

